సృజనకు నెలసరి సమయంలో బ్లీడింగ్‌ ఎక్కువగా అవుతుంటుంది.. అయితే శ్యానిటరీ న్యాప్‌కిన్స్‌ వాడినా అప్పుడప్పుడూ లీకేజీ సమస్యతో ఇబ్బంది పడుతోంది. ఇటీవలే తన స్నేహితురాలి సలహా మేరకు మెన్‌స్ట్రువల్‌ కప్‌ వాడాలని నిర్ణయించుకుందామె.
సుప్రియ మెన్‌స్ట్రువల్‌ కప్‌ వాడాలని ఎప్పట్నుంచో అనుకుంటోంది. అయితే దాన్ని ఎలా వాడాలి? తనకు ఏ సైజ్‌ సరిపోతుందో తెలియక, ఆ వివరాల గురించి ఇతరులను అడగడానికి మొహమాటపడుతోంది.
మెన్‌స్ట్రువల్‌ కప్‌.. మహిళలందరికీ ఈ పేరు తెలిసినా, అసలు దీన్నెలా వాడాలి? ఒకవేళ వాడినా అసౌకర్యంగా ఉంటుందేమో, రక్తం లీకవుతుందేమో అన్న సందేహాలు చాలామందిలో ఉంటాయి. అయితే వీటిని కొనే ముందు, వాడే ముందు కొన్ని విషయాలు తెలుసుకుంటే దీన్ని సులభంగా ధరించి, సౌకర్యవంతంగా ఉండచ్చంటున్నారు నిపుణులు. పైగా ఇది తక్కువ ధరలో లభించడంతో పాటు ప్రత్యుత్పత్తి వ్యవస్థపై ఎలాంటి ప్రతికూల ప్రభావం చూపదని సలహా ఇస్తున్నారు. మరైతే ఆలస్యమెందుకు..? మెన్‌స్ట్రువల్‌ కప్‌కు సంబంధించిన కొన్ని ప్రాథమిక అంశాల గురించి కొనే ముందే తెలుసుకోవడం మంచిది కదా!
నెలసరి సమయంలో ప్రస్తుతం చాలామంది మహిళలు శ్యానిటరీ న్యాప్‌కిన్లను ఎంచుకుంటున్నారు. అయితే ఇవి ఒకసారి వాడి పడేసేవి కాబట్టి వీటివల్ల పర్యావరణానికి బోలెడంత నష్టం వాటిల్లుతుంది. అంతేకాదు.. కొన్ని రకాల న్యాప్‌కిన్ల తయారీలో వాడే రసాయనాల వల్ల ప్రత్యుత్పత్తి వ్యవస్థపై తీవ్ర ప్రతికూల ప్రభావం పడుతుంది. ఇక బ్లీడింగ్‌ ఎక్కువగా అయ్యే మహిళలు పదే పదే వీటిని మార్చుకోలేక ఇబ్బంది పడుతుంటారు.. ఈ సమస్యలన్నీ లేకుండా నెలసరిని సౌకర్యవంతంగా గడిపేయాలంటే మెన్‌స్ట్రువల్‌ కప్‌ చక్కటి ఎంపిక అంటున్నారు నిపుణులు. రబ్బర్‌, సిలికాన్‌.. వంటి పదార్థాలతో ఈ కప్స్‌ని తయారుచేస్తారు. అలాగే వీటిని పదే పదే ఉపయోగించే వెసులుబాటు ఉండడం వల్ల ఇటు మీ ఆరోగ్యానికి, అటు పర్యావరణానికీ ఎలాంటి నష్టమూ వాటిల్లదు.
ఎలా ఎంచుకోవాలంటే..!
మెన్‌స్ట్రువల్‌ కప్‌ గురించి తెలిసినా, అది ఎలా ఉంటుందో చూసినప్పటికీ దాన్ని ఎంచుకునే విషయంలో చాలామందికి పలు సందేహాలుంటాయి. ఎందుకంటే ఈ కప్స్‌లో వివిధ పరిమాణాలుండడమే అందుకు కారణం. సాధారణంగా చిన్నవి (Small), పెద్దవి (Large).. ఇలా రెండు సైజుల్లో లభిస్తాయివి. ఇందులోనూ కొద్ది తేడాల్లో మీడియం, XL సైజులు కూడా ఉంటాయి. అయితే వీటిని ఎంచుకునే ముందు మీ వయసును పరిగణనలోకి తీసుకోవాల్సి ఉంటుందంటున్నారు నిపుణులు. 30 ఏళ్ల లోపున్న వారు అది కూడా సహజ ప్రసవం కాని వారు చిన్న సైజు కప్‌ (Small, Medium)ని ఎంచుకోవచ్చు.. అదే 30 ఏళ్లు పైబడి, సహజ కాన్పు అయిన వారు; నెలసరి సమయంలో బ్లీడింగ్‌ ఎక్కువగా అయ్యే వారికి పెద్ద సైజు కప్‌ (Large, XL) సరిపోతుంది. అలాగే కప్‌ ఎంచుకునే ముందు మీ గర్భాశయ ముఖద్వారం పొడవును కూడా పరిగణనలోకి తీసుకోవాలంటున్నారు నిపుణులు. ఈ క్రమంలో పొడవు తక్కువగా ఉంటే (సర్విక్స్ చిన్నగా ఉంటే) చిన్న కప్‌, పొడవు ఎక్కువగా ఉంటే పెద్ద కప్‌ ఎంచుకోమంటున్నారు. అయితే ఇందులోనూ మీకేమైనా సందేహాలుంటే ఓసారి గైనకాలజిస్ట్ సలహా తీసుకోవడం మంచిది.
ఇలా చేస్తే పెట్టుకోవడం సులువు!
నెలసరి సమయంలో కప్‌ ఉపయోగిస్తే అసౌకర్యంగా ఉంటుందేమో అనుకుంటారు చాలామంది. అయితే అది మనం అమర్చుకున్న విధానంపై ఆధారపడి ఉంటుందంటున్నారు నిపుణులు. తొలిసారి ఉపయోగించే వారికి మొదట్లో పెట్టుకోవడం ఇబ్బందిగా అనిపిస్తే.. దాని పైభాగంలో కాస్త లూబ్రికెంట్‌ రాయాలి. అప్పుడు కప్‌ను సులభంగా అమర్చుకోవచ్చు. అంతేకాదు పెట్టుకునే ముందు ఈ జాగ్రత్తలు కూడా తీసుకోవాలి.
*చేతులు శుభ్రం చేసుకోవాలి.
*మొదటిసారి పెట్టుకోవడం ఇబ్బందిగా అనిపిస్తే కప్‌కు ముందు భాగంలో లూబ్రికెంట్‌ రాసి.. మధ్యలోకి మడవాలి. ఇప్పుడు మొనదేలి ఉన్న భాగాన్ని కిందికి, మడిచిన భాగం పైకి ఉండేలా చూసుకొని వెజైనాలో అమర్చుకోవాలి.
*కప్‌కి కింద ఉన్న మొనదేలిన భాగాన్ని మరీ లోపలికి కాకుండా కొన్ని ఇంచులు బయటికి ఉండేలా పెట్టుకుంటే దాన్ని సులభంగా బయటికి తీయచ్చు.
*ఇక అమర్చుకున్నాక ఒకసారి గుండ్రంగా తిప్పడం వల్ల అది కరక్ట్‌గా అడ్జస్ట్‌ అవుతుంది. ఫలితంగా లీకయ్యే ప్రమాదం ఉండదు.
అందుకే వాటి కంటే కప్స్‌ బెటర్‌!
ఇలా ఈ కప్‌ అమర్చుకున్న తర్వాత అసలు పిరియడ్స్ వచ్చినట్లు కూడా అనిపించకుండా సౌకర్యవంతంగా ఉంటుందంటున్నారు నిపుణులు. ఈ క్రమంలో ఈత కొట్టడం, వ్యాయామం చేయడం, గెంతడం, రోప్‌ స్కిప్పింగ్‌.. ఇలా మీకు నచ్చిన పనిని చేసుకోవచ్చు. అయితే సాధారణంగా శ్యానిటరీ న్యాప్‌కిన్లు వాడేటప్పుడు బ్లీడింగ్‌ను బట్టి వాటిని మార్చుకోవాల్సి ఉంటుంది. ఈ క్రమంలో కొంతమంది రెండు గంటలకోసారి మార్చుకుంటే.. మరికొంతమందికి నాలుగ్గంటల దాకా అవి రక్షణనిస్తాయి. అయితే ఎంతైనా మెన్‌స్ట్రువల్‌ కప్స్‌ ఇచ్చినంత రక్షణ.. శ్యానిటరీ ప్యాడ్స్‌, ట్యాంపూన్స్‌ ఇవ్వలేవంటున్నారు నిపుణులు.
ఈ క్రమంలో సాధారణ రక్తస్రావం అయ్యేవారు 12 గంటలకోసారి కప్‌ని తొలగించుకొని, శుభ్రం చేసుకోవాలి. అదే బ్లీడింగ్‌ మరీ ఎక్కువగా అయ్యే వారు ఆరు గంటలకోసారి కప్‌ను మార్చుకోవాల్సి ఉంటుంది. ఇక తొలగించే ముందు కూడా చేతులు శుభ్రం చేసుకోవడం, తొలగించాక శుభ్రంగా కడిగి, పొడిగా తుడిచాకే తిరిగి ఉపయోగించుకోవాలి. ఇలా మనం ఎంచుకునే కప్‌ నాణ్యత, వాటిని వాడే విధానాన్ని బట్టి అవి ఆరు నెలల నుంచి పదేళ్ల దాకా మన్నే అవకాశం ఉంటుంది. పైగా వీటి సైజ్‌, నాణ్యతను బట్టి ధర రూ. 198 నుంచి మొదలవుతుంది. అంటే.. ఒకట్రెండు కొనుక్కొని పెట్టుకుంటే కొన్నేళ్ల దాకా నెలసరి ఉత్పత్తులపై డబ్బు ఖర్చు పెట్టాల్సిన అవసరం ఉండదు.
కప్స్‌తో ప్రయోజనాలెన్నో!
*మెన్‌స్ట్రువల్‌ కప్స్‌ వెజైనాను పొడిబారేలా చేయవు. తద్వారా అక్కడుండే మంచి బ్యాక్టీరియా తొలగిపోకుండా ఉంటుంది. ఫలితంగా వెజైనల్‌ ఇన్ఫెక్షన్లు వచ్చే అవకాశం అరుదుగా ఉంటుంది.
*కొన్ని రకాల శ్యానిటరీ న్యాప్‌కిన్లు, ట్యాంపూన్లలో బ్లీచ్‌, డయాక్సిన్‌.. వంటి రసాయనాలు వాడుతుంటారు. అవి పలు రకాల క్యాన్సర్లకు కారణమయ్యే ప్రమాదముందని ప్రపంచ ఆరోగ్య సంస్థ హెచ్చరిస్తోంది. కానీ మెన్‌స్ట్రువల్‌ కప్స్‌ తయారీలో ఇవేవీ వాడరు.. కాబట్టి నిరభ్యంతరంగా వీటిని ఉపయోగించుకోవచ్చంటున్నారు నిపుణులు.
*రక్తస్రావం లీకవడం వల్ల దానికి గాలి తగిలి దుర్వాసన వచ్చే అవకాశం ఉంటుంది. అదే కప్స్‌ వాడితే ఆ సమస్య ఉండదు.. ఎందుకంటే బ్లీడింగ్‌ని బట్టి వీటిని నిర్ణీత వ్యవధుల్లో తొలగించుకొని శుభ్రం చేసుకుంటే కప్‌ నుంచి రక్తం లీకయ్యే అవకాశం చాలా తక్కువగా ఉంటుంది.
*నెలసరి సమయంలో శ్యానిటరీ న్యాప్‌కిన్లు ధరించడం వల్ల కూర్చోవడం, లేవడం, ఏదైనా కఠినమైన పని చేసుకోవడానికి కాస్త అసౌకర్యానికి గురయ్యే అవకాశం ఉండచ్చు.. కానీ మెన్‌స్ట్రువల్‌ కప్‌ వల్ల అలాంటి అసౌకర్యం ఉండనే ఉండదంటున్నారు నిపుణులు.
మెన్‌స్ట్రువల్‌ కప్‌ గురించి తెలుసుకున్నాక ఇక పిరియడ్స్ గురించి చింత అవసరం లేదనిపిస్తోంది కదూ! అయితే వీటిని ధరించినప్పుడు దురద, మంటగా అనిపించినా; మరీ బలవంతంగా తోసేయాల్సి వచ్చినా.. నిర్లక్ష్యం చేయకుండా గైనకాలజిస్ట్‌ని సంప్రదించండి. అసలు అలా ఎందుకు జరుగుతోందో, సమస్యేంటో తెలుసుకొని పరిష్కరించుకోండి..!