|
జిమ్‌ సెంటర్ల నిర్వాహకులకు..!
* 65 ఏళ్లున్న వారు, అనారోగ్య సమస్యలున్న వారు, గర్భిణులు, పదేళ్ల లోపు పిల్లలను.. జిమ్‌, యోగా కేంద్రాల్లోకి అనుమతించకూడదు. ఈ మేరకు సిబ్బంది తగిన చర్యలు తీసుకోవాలి.
* యోగా, వ్యాయామం చేసేటప్పుడు సాధ్యమైనంత వరకు ఫేస్‌షీల్డ్‌ పెట్టుకోవాలి. మాస్క్‌ ఉపయోగిస్తే ఊపిరి తీసుకోవడానికి ఇబ్బంది అవుతుంది. వ్యాయామం, యోగా చేయని సమయాల్లో తప్పనిసరిగా మాస్క్‌ ధరించాలి.
* ప్రతి కేంద్రంలో ఒక్కో మనిషికి 4 చదరపు మీటర్ల స్థలం కేటాయించాలి. వ్యాయామ పరికరాలు ఉన్న చోట కూడా 6 అడుగుల భౌతికదూరం పాటించాలి. దీని ప్రకారం ఒక్కో సెషన్‌కు ఎంతమందిని అనుమతించాలో అంచనా వేసి ఆ మేరకు తరగతుల ప్రణాళిక రూపొందించుకోవాలి. తరగతుల మధ్య కనీసం 15 నిమిషాల నుంచి 30 నిమిషాల సమయం తేడా ఉండాలి.
* వ్యక్తిగత శిక్షణ ఇచ్చేటప్పుడు ట్రైనర్‌, నేర్చుకొనే వారికి మధ్య కనీసం 6 అడుగుల దూరం ఉండాలి. వ్యాయామశాలలోకి సిబ్బంది, సభ్యులను పరిమిత సంఖ్యలోనే అనుమతించాలి.
* కంటెయిన్‌మెంట్‌ జోన్లలో యోగా, జిమ్‌ సెంటర్లు తెరవకూడదు. ఈ జోన్లలో నివాసం ఉండే శిక్షకులు, అభ్యాసకులు తరగతులకు హాజరవకూడదు.
* జిమ్‌లోకి వెళ్లే, వెలుపలికి వచ్చే మార్గాలు వేర్వేరుగా ఉండాలి. అందుకు తగ్గ మార్కింగ్‌లు పెట్టాలి. వచ్చి వెళ్లేటప్పుడు క్యూలు పాటించాలి. ఒకరికొకరు ముట్టుకోకుండా డిజిటల్‌ చెల్లింపులను ప్రోత్సహించాలి.
* ఏసీలకు సంబంధించి ఇదివరకు సీపీడబ్ల్యూడీ జారీచేసిన మార్గదర్శకాలు అనుసరించాలి. ఏసీలు 24-30 డిగ్రీల సెల్సియస్‌లో నిర్వహించాలి. గది లోపల గాలిలో తేమ 40-70% ఉండాలి. సాధ్యమైనంత వరకు సహజమైన గాలి వచ్చిపోయేలా కిటికీలు కొంత మేర తెరిచి ఉంచాలి.
* వీలైతే ఆరుబయట యోగా, వ్యాయామ తరగతులు నిర్వహించాలి.
* యోగా కేంద్రాలు, వ్యాయామ శాలలు శుభ్రం చేసే సిబ్బందికి వ్యర్థాల నిర్వహణలో శిక్షణ ఇవ్వాలి. ఇందులో పనిచేసే వయోవృద్ధులు, గర్భిణులు, ఇతర అనారోగ్యాలున్న వారు తగిన జాగ్రత్తలు తీసుకోవాలి. ఇలాంటి వారిని జిమ్‌కు వచ్చేవారితో నేరుగా కలుసుకునే పనుల్లో పెట్టకూడదు.
* ఈ కేంద్రాలకు వచ్చే సందర్శకులు, సభ్యులు, సిబ్బందికి ఫేస్‌ కవర్లు, మాస్కులు, శానిటైజర్లు అందుబాటులో ఉంచాలి. వ్యాయామం చేయకముందు, చేసిన తర్వాత పరికరాలు, నేలను శుభ్రం చేయడానికి క్రిమిరహితం చేసే ద్రావణాలు, వాడిపడేసే కాగితపు తువ్వాళ్లు.. వంటివి అందుబాటులో ఉంచాలి. చెత్తబుట్టలను ఎల్లప్పుడూ మూసి ఉంచాలి.
* ప్రతి ఒక్కరి మధ్య వేలును శానిటైజర్‌తో శుభ్రం చేసి ఆక్సీమీటర్‌ ద్వారా ఆక్సిజన్‌ స్థాయిని పరీక్షించాలి. 95%కంటే తక్కువ ఉన్న వారిని వ్యాయామానికి అనుమతించొద్దు. వ్యాయామం చేస్తున్నప్పుడు ఊపిరి తీసుకోవడంలో సమస్య తలెత్తితే వెంటనే ఆక్సిజన్‌ స్థాయి చూడాలి. 95% కంటే తక్కువ ఉన్నవారిని మళ్లీ కసరత్తులు చేయడానికి అనుమతించకూడదు. వెంటనే కాల్‌సెంటర్‌, హెల్ప్‌లైన్‌, అంబులెన్స్‌కి ఫోన్‌చేసి అలాంటి వారిని సమీప ఆరోగ్య కేంద్రానికి పంపాలి.
* లక్షణాలు లేని వారిని మాత్రమే లోపలికి అనుమతించాలి. అదికూడా ఫేస్‌మాస్క్‌ ఉంటేనే!
* అన్ని ప్రవేశ ద్వారాల్లో శానిటైజర్‌, థ్మరల్‌ స్క్రీనింగ్‌ సౌకర్యాలు తప్పనిసరిగా ఏర్పాటుచేయాలి.
* పార్కింగ్‌ స్థలాలు, కారిడార్లు, లిఫ్ట్‌ల్లోనూ భౌతికదూరం అమలుచేయాలి.
* చెప్పులు, బూట్లు బయట వదలాలి. వీలైతే ఒక్కో వ్యక్తి/కుటుంబాల పాదరక్షలు ప్రత్యేక అరల్లో పెట్టాలి.
* వ్యక్తులు వచ్చి పోయే సమయాలు, వారి ఫోన్‌ నెంబర్లు, చిరునామాలను విధిగా నమోదుచేయాలి.
* ప్రతి జిమ్‌ పరికరం దగ్గర హ్యాండ్‌ శానిటైజర్‌ ఉంచాలి. వాటిని ముట్టుకోబోయే ముందు ప్రతి ఒక్కరూ చేతులను శానిటైజర్‌తో శుభ్రం చేసుకొనేలా జాగ్రత్తలు తీసుకోవాలి.
* స్పాలు, ఆవిరి స్నానాలు, ఈత కొలనులు మూసేయాలి.
* ఎవరికి వారు సొంతంగా మ్యాట్లు తెచ్చుకొని, పూర్తయిన తర్వాత వెంట తీసుకెళ్లేలా చూడాలి.
* వైరస్‌ సంక్రమణాన్ని దృష్టిలో ఉంచుకుని గట్టిగా అరవడం, నవ్వడం లాంటివి నిషేధించాలి.
* మరుగుదొడ్లు, స్నానపు గదులను వాడక ముందు, తర్వాత శుభ్రం చేయాలి.
* వ్యాయామ కేంద్రాన్ని మూసివేసే ముందు మొత్తం ప్రాంగణాన్ని శానిటైజ్‌ చేయాలి.
* అనారోగ్య సమస్య తలెత్తిన వారిని ప్రత్యేక గదిలో ఉంచాలి. వైద్యుడు పరిశీలించేంత వరకూ మాస్క్‌ పెట్టుకునేలా చూడాలి. ఒకవేళ సదరు వ్యక్తికి పాజిటివ్‌ వస్తే మొత్తం ప్రాంగణాన్ని క్రిమిరహిత ద్రావణాలతో శుభ్రం చేయాలి.
* కొంతకాలం వరకు యోగా క్రియలు ఆపేయాలి. ఒకవేళ తప్పనిసరిగా చేయాల్సి వస్తే ఆరుబయట ప్రాంతాల్లో చేయాలి. యోగాభ్యాసకులు ఆయుష్‌ మంత్రిత్వశాఖ జారీచేసిన మార్గదర్శకాలు అనుసరించాలి.
|