పవర్‌ స్టార్‌ పవన్‌ కళ్యాణ్‌, నటి రేణూ దేశాయ్‌ జంటగా తెరకెక్కిన చిత్రం ‘బద్రి’. ఈ చిత్రం నేటితో 21 వసంతాలను పూర్తి చేసుకుంది. ఈ సందర్భంగా రేణూ దేశాయ్‌ సినిమాలోని ఓ స్టిల్‌ని అభిమానులతో పంచుకుంది. దీనికి ‘నా దుపట్టాని సన్‌స్క్రీన్‌గా ఉపయోగించుకున్నాను.. ఇది ‘చికితా’ పాట షూటింగ్‌ సందర్భంగా తీసిన ఫొటో’ అని చెప్పుకొచ్చింది.

బాలీవుడ్‌ బ్యూటీ అనుష్కా శర్మ ‘కొన్ని ప్రత్యేకమైన, అమూల్యమైన జ్ఞాపకాలు’ అంటూ గడిచిన సంవత్సరం తన భర్త విరాట్ కోహ్లీతోను, కొంతమంది పిల్లలతోనూ గడిపిన కొన్ని మధుర క్షణాలను అభిమానులతో పంచుకుంది.

టాలీవుడ్‌ నటి రేణూ దేశాయ్‌ మాస్క్‌ ధరించిన ఫొటోని పోస్ట్‌ చేసింది. ఈ సందర్భంగా ‘2021తో కొవిడ్ అంతమవుతుందని, ఆ తర్వాత సాధారణ జీవితాన్ని గడపచ్చని భావించాం. కానీ, అది ఇంకా ఎక్కువ దూరంలో ఉంది. కాబట్టి, అందరూ మాస్క్‌ ధరించండి, సామాజిక దూరాన్ని పాటించండి, అలాగే సాధ్యమైనంత వరకు ఇంటి దగ్గరే ఉండడానికి ప్రయత్నించండి. నేను కూడా సాధ్యమైనంతవరకు ఇంటి దగ్గరే ఉంటున్నాను. ఈ నెల 19న షూటింగ్‌ ఉంది. అది కూడా కొంతమందితోనే ఉంటుంది. ఆ తర్వాత కనీసం నెల పాటు స్వీయనిర్భంధంలో ఉంటాను.’ అంటూ కరోనా జాగ్రత్తలు తీసుకోమని చెబుతోంది.

అందాల తార లక్ష్మీ రాయ్‌ తన తాజా ఫొటోని పోస్ట్‌ చేస్తూ ‘మీ మనసుకు నచ్చిన పనే చేయండి’ అని చెప్పుకొచ్చింది. దీనికి మీకు మీరుగా ఉండండి, దృఢంగా ఉండండి వంటి హ్యాష్‌ట్యాగులను జోడించింది.

అందాల తార అదా శర్మ తన తాజా ఫొటోలను పోస్ట్‌ చేస్తూ ఆసక్తికరమైన క్యాప్షన్‌ని రాసుకొచ్చింది. అదేంటో చూద్దాం రండి..

‘మహానటి’ కీర్తి సురేశ్‌ బోట్‌ కోసం పరుగులు పెడుతున్నట్టుగా తీసిన వీడియోని పోస్ట్‌ చేసింది. దీనికి ‘వారాంతం కోసం ఇలా ఎదురుచూస్తాను’ అనే వ్యాఖ్యని జోడించింది.

నటి, నిర్మాత మంచు లక్ష్మి ‘వండర్ విమెన్’ అంటూ స్ఫూర్తిమంతమైన మహిళల గాథలను తన అభిమానులతో పంచుకుంటోంది. తాజాగా డిజైనర్‌ అనితా సాగర్‌ గురించి పోస్ట్ చేసింది. ‘గత మూడు వారాల నుంచి మీకు స్ఫూర్తిమంతమైన మహిళల గురించి తెలియజేస్తున్నాను. తాజాగా ప్రముఖ డిజైనర్‌ సాగర్‌ తెనాలి భార్య, అనితా సాగర్‌ గురించి మీకు చెప్పాలనుకుంటున్నాను. హైదరాబాద్‌లో సాగర్‌ తెనాలి అనే ప్రముఖ డిజైనర్‌ ఉండేవారు. ఆయన 2016లో గుండెపోటుతో మరణించారు. ఆయన మంచి ఫ్యాషన్‌ డిజైనర్‌ కావాలని, అంతర్జాతీయ వేదికలపై తన దుస్తులు ప్రదర్శించాలని కలలు కన్నారు. ఆయన కలలను తన భార్య అనితా సాగర్‌ నిజం చేయాలనుకుంది. దానిని ఒక ఛాలెంజ్‌గా తీసుకుని ఫ్యాషన్‌ డిజైనింగ్‌ నేర్చుకోవాలని నిర్ణయం తీసుకుంది. తన ఇద్దరు పిల్లలను చూసుకుంటూ తల్లిదండ్రులు, అత్తమామల సహకారంతో తన సంకల్పాన్ని నెరవేర్చుకునే ప్రయత్నం చేస్తోంది.

టాలీవుడ్‌ నటి పూజా హెగ్డే, అక్కినేని అఖిల్‌ సరసన ‘మోస్ట్‌ ఎలిజిబుల్‌ బ్యాచిలర్‌’ చిత్రంలో నటిస్తోన్న సంగతి తెలిసిందే. ఈ సందర్భంగా పూజ ‘లాస్ట్‌ డే ఆఫ్‌ స్కూల్‌’ అంటూ ఓ ఫొటోని అభిమానులతో పంచుకుంది.

టాలీవుడ్‌ నటి లక్ష్మీ రాయ్‌ తన అందమైన ఫొటోని పోస్ట్‌ చేసింది. ఈ సందర్భంగా ‘ఆమె మృదుత్వం అనే కిరీటాన్ని ధరించింది’ అని రాసుకొచ్చింది.

అందాల తార లక్ష్మీ రాయ్‌ తన తాజా ఫొటోని పోస్ట్‌ చేసింది. దీనికి ‘మీతో మీరు నిజాయతీగా ఉండలేకపోతే.. వేరొకరితోనూ నిజాయతీగా ఉండలేరు’ అనే వ్యాఖ్యని జోడించింది.

బాలీవుడ్‌ నటి కాజోల్ ఓ పుస్తకం చదువుతోన్న ఫొటోని పోస్ట్‌ చేసింది. ఈ సందర్భంగా ‘ఈ పదమంటే నాకెంతో ఇష్టం’ అంటూ ఇంగ్లీష్‌లోనే పొడవైన పదాన్ని (supercalifrangilisticexpialodocious) పోస్ట్ చేసింది. అయితే ‘ఈ పదం నేను చదువుతోన్న బుక్‌లో లేదు’ అని చెప్పుకొచ్చింది. ఈ పదం గురించి శోధించగా ఇది అర్థరహిత పదం అని తెలిసింది. అయితే అమితంగా ప్రశంసించాల్సిన సందర్భాలలో ‘అద్భుతం, చాలా బాగుంది’ మొదలైన వాటికి సమానార్థకంగా దీనిని ఉపయోగిస్తారని తెలిసింది. ఎక్కువగా పిల్లలే ఈ పొడవైన పదాన్ని వాడడం గమనార్హం.

టాలీవుడ్‌ నటి రేణూ దేశాయ్‌ తన కూతురు ఆద్య నవ్వుతోన్న ఫొటోని పోస్ట్‌ చేసింది. ఈ సందర్భంగా ‘ఆద్య ఈ రోజు ఉదయం ‘మమ్మీ.. నా పుట్టినరోజుకు ఇంకా 22 రోజులు ఉంది’ అని చెప్పింది. మరో నెలలో బర్త్‌డే అనేసరికి ఆ ఆనందం ఈ క్యూటీ మొహంలో స్పష్టంగా కనిపిస్తోంది’ అని రాసుకొచ్చింది.

నటి హిమజ హీరో పవన్‌ కళ్యాణ్‌తో దిగిన ఫొటోలని పోస్ట్‌ చేసింది. ఈ సందర్భంగా ‘ఓ మై గాడ్‌.. ఈ రోజుకి నా కోరిక నెరవేరింది. పవన్‌ కళ్యాణ్‌ గారిని తొలిప్రేమ చిత్రంలో చూసినప్పుడు కనీసం ఆయనను ప్రత్యక్షంగా చూస్తానా? అనుకున్నా.. ప్రస్తుతం ఆయన 27వ సినిమాలో నటించే అవకాశం వచ్చింది. ఈ అవకాశం ఇచ్చిన డైరెక్టర్ క్రిష్‌ గారికి ధన్యవాదాలు. మీతో పనిచేయడం నా అదృష్టం’ అని రాసుకొచ్చింది.

బాలీవుడ్‌ భామ కరీనా కపూర్‌ పండంటి బాబుకి జన్మనిచ్చింది. ఈ విషయాన్ని అభిమానులతో పంచుకుంటూ ‘21-02-2021.. అబ్బాయి పుట్టాడు. టిమ్‌కి బుడ్డి తమ్ముడు వచ్చాడు’ అని రాసుకొచ్చింది.

తెలుగు తార అంజలి ‘త్రో బ్యాక్‌’ అంటూ బైక్‌ నడుపుతున్నట్టుగా దిగిన ఫొటోని పోస్ట్ చేసింది.

బాలీవుడ్‌ బ్యూటీ ప్రియాంకా చోప్రా రోజా పూల దగ్గర కూర్చున్న ఫొటోని పోస్ట్‌ చేసింది. ఈ సందర్భంగా ‘ఈ రోజా పూల మధ్యన నువ్వు కూడా ఉండాలని కోరుకుంటున్నాను నిక్‌’ అని రాసుకొచ్చింది.

నటి హిమజ పోలీసు గెటప్‌లో దిగిన ఓ ఫొటోని అభిమానులతో పంచుకుంది. ఈ సందర్భంగా ‘ఇది నా డ్రీమ్‌’ అని చెప్పుకొచ్చింది.

గాయని సునీత తన పిల్లలతో దిగిన ఫొటోని అభిమానులతో పంచుకుంది.

బాలీవుడ్‌ నటి ఇషితా దత్తా రిఫ్రిజిరేటర్‌ ఓపెన్‌ చేసి ‘ష్..’ అంటోన్న ఫొటోలను పోస్ట్‌ చేసింది. దీనికి ‘ప్రతిరోజూ ఛీట్‌ డేనే!’ అనే వ్యాఖ్యని జోడించింది.

టాలీవుడ్‌ బ్యూటీ రాశీ ఖన్నా తన తాజా ఫొటోని పోస్ట్‌ చేస్తూ ‘గొప్ప పనులు చేయడానికే మీరిక్కడున్నారన్న విషయం ప్రతిరోజూ గుర్తుచేసుకోండి..’ అని రాసుకొచ్చింది.

అందాల భామ తేజస్వీ మదివాడ పుస్తకం చదువుతోన్న ఫొటోని పోస్ట్‌ చేస్తూ ‘2021 ఎవరి మాటా వినడం లేదు’ అని రాసుకొచ్చింది.

టెన్నిస్ తార సానియా మీర్జా తన బాబు ఇజాన్‌తో కలిసి దిగిన అందమైన ఫొటోని పోస్ట్‌ చేసింది.

మిల్కీ బ్యూటీ తమన్నా, నటుడు సత్యదేవ్‌తో కలిసి ‘గుర్తుందా శీతాకాలం’ అనే చిత్రంలో నటిస్తోంది. ఈ చిత్రం కన్నడలో విజయం సాధించిన ‘లవ్ మాక్‌టెయిల్‌’కి రీమేక్ గా రూపుదిద్దుకుంటోంది. కన్నడ చిత్రంలో నటించిన క్రిష్ట, మిలాన్‌లు ‘గుర్తుందా శీతాకాలం’ సెట్‌లో తాజాగా సందడి చేశారు. ఈ సందర్భంగా తీసిన ఫొటోని తమన్నా తన అభిమానులతో పంచుకుంది.

టాలీవుడ్‌ భామ నిషా అగర్వాల్‌ తాజాగా ఓ వీడియోని అభిమానులతో పంచుకుంది. దీనికి ‘ఇల్లు’ అనే పదం చాలా అందమైనది. మీ ఇంటిని చూస్తే మీ వ్యక్తిత్వం, ఇష్టాల గురించి తెలిసిపోవాలి. ఇటీవలే కొన్ని మొక్కలతో నా ఇంటికి జీవం పోశాను’ అంటూ ఇంట్లో మొక్కలు ఉండడం వల్ల కలిగే ప్రయోజనాల గురించి చెప్పుకొచ్చింది.

టాలీవుడ్‌ కొత్త జంట నిహారిక కొణిదెల, చైతన్యలు తమ హనీమూన్‌ని మాల్దీవుల్లో మొదలుపెట్టి.. తాజాగా గోవాకి చేరుకున్నారు. ఈ సందర్భంగా అక్కడ దిగిన ఫొటోలను అభిమానులతో పంచుకుంది నిహా.

‘జబర్దస్త్‌’ యాంకర్‌ అనసూయ నూతన సంవత్సరం సందర్భంగా తన భర్త, పిల్లలతో సరదాగా గడిపిన జ్ఞాపకాలను అభిమానులతో పంచుకుంది.

టాలీవుడ్‌ నటి వితిక నవ్వుతోన్న తన ఫొటోని అభిమానులతో పంచుకుంది.

టెన్నిస్‌ తార సానియా మీర్జా ఎడారిలో దిగిన ఫొటోలను పోస్ట్‌ చేసింది. ఈ సందర్భంగా ‘అద్భుతమైన జ్ఞాపకాలను ఫిల్టర్‌ చేయాల్సిన అవసరం ఉండదు’ అని అర్థం వచ్చే వ్యాఖ్యని జత చేసింది.

నేపథ్య గాయని శ్రేయా ఘోషల్‌ నిన్న (డిసెంబర్‌ 21) ఏర్పడిన గురు, శని గ్రహాల మహా సంయోగాన్ని తన టెలిస్కోప్‌ ద్వారా వీక్షించింది. అలాగే పనిలో పనిగా జాబిల్లి వైపు కూడా ఓ లుక్కేసింది. ఈ వీడియోలు సోషల్‌ మీడియాలో చక్కర్లు కొడుతున్నాయి.

కన్నడ భామ ప్రణీత గుర్రంతో దిగిన ఫొటోలను పోస్ట్‌ చేసింది. దీనికి ‘గుర్రాలపై నాకున్న ప్రేమ కొనసాగుతూనే ఉంటుంది’ అనే వ్యాఖ్యని జత చేసింది.

అందాల తార శిల్పా శెట్టి మనసారా నవ్వుతోన్న ఫొటోని పోస్ట్‌ చేస్తూ.. నవ్వడం వల్ల కలిగే ప్రయోజనాలను వివరించింది. ‘మనస్ఫూర్తిగా నవ్వడం వల్ల వ్యాధినిరోధక శక్తి పెరగడంతో పాటు శారీరక, మానసిక ఒత్తిళ్ల నుంచి బయటపడచ్చు. అంతేకాదు.. మనసారా నవ్విన తర్వాత 45 నిమిషాల దాకా కండరాలు విశ్రాంత స్థితిలో ఉంటాయి. స్వేచ్ఛగా, మనస్ఫూర్తిగా నవ్వడం అనేది ఈ రోజుల్లో సర్వసాధారణమైపోయింది. కాబట్టి కుటుంబ సభ్యులు, స్నేహితులతో కలిసి ఆనందంగా గడపండి. లేదంటే కామెడీ సినిమాలు, వీడియోలు వంటివి చూడండి.. అదీ కాదంటే కామెడీ పుస్తకాలు చదవండి. ఎందుకంటే నవ్వే మనకు అత్యుత్తమమైన ఔషధం’ అంటూ నవ్వు నాలుగు విధాలుగా మేలు అనే సామెతను గుర్తు చేసిందీ ఫిట్‌నెస్‌ ఫ్రీక్‌.

బుల్లితెర తార వర్షిణి ‘ఢీ చాంపియన్స్‌’ కార్యక్రమానికి సంబంధించిన తాజా ఫొటోలను అభిమానులతో పంచుకుంది.

నటి నిషా అగర్వాల్‌ తన సోదరి కాజల్‌ అగర్వాల్‌ని హగ్‌ చేసుకున్న ఫొటోని పోస్ట్‌ చేసింది. ఈ సందర్భంగా- ‘ఇప్పటికీ అక్క పెళ్లి ముచ్చట్లే గుర్తుకు వస్తున్నాయి.. ఇంకా ఆ వేడుకలు పూర్తయినట్లే లేదు..’ అని చెప్పుకొచ్చింది.

బాలీవుడ్‌ భామ మల్లికా శెరావత్‌ తన తాజా ఫొటోని పోస్ట్‌ చేసింది. ఈ సందర్భంగా ‘శరదృతువు (ఆకులు రాలే కాలం) అంటే నాకు చాలా ఇష్టం’ అని చెప్పుకొచ్చింది.