బాలీవుడ్‌ బ్యూటీ కరీనా కపూర్‌ పౌట్‌ పోజ్‌లో దిగిన ఫొటోని పోస్ట్‌ చేసింది. ఈ సందర్భంగా ‘ఇంటికి వెళుతున్నందుకు ఆనందంగా ఉంది’ అని పోస్ట్‌ చేసింది. దీనికి తన సోదరి కరిష్మా ‘హర్రీ.. నిన్ను చాలా మిస్సయ్యాను’ అని రిప్లై ఇచ్చింది.

‘మహానటి’ కీర్తి సురేశ్‌ నేడు తన పుట్టిన రోజు జరుపుకుంటోంది. ఈ సందర్భంగా సూపర్‌ స్టార్‌ మహేష్‌ దంపతులు, నటి మీనా తదితరులు తనకి పుట్టినరోజు శుభాకాంక్షలు తెలిపారు.

బాలీవుడ్‌ సుందరి బిపాసా బసు ఒక సోఫాలో నుంచి మరొక సోఫాలోకి జంప్‌ చేస్తున్నట్టుగా దిగిన జిఫ్‌ ఫొటోని పోస్ట్ చేసింది. దీనికి ‘అద్భుతమైన సోమవారాల్లోకి అడుగుపెడుతున్నాం..’ అంటూ మిరాకిల్‌ మండే, ఆనందంగా ఉండండి అనే హ్యాష్‌ట్యాగ్‌లను జోడించింది.

టాలీవుడ్‌ భామ సమంత తమ పెళ్లి రోజు సందర్భంగా భర్త నాగచైతన్యతో దిగిన ఫొటోని అభిమానులతో పంచుకుంది. దీనికి ‘నీకు నేను.. నాకు నువ్వు.. ఒకరికొకరం కష్టసుఖాలు ఏవైనా కలిసి పంచుకుందాం. ప్రియమైన శ్రీవారికి వివాహ వార్షికోత్సవ శుభాకాంక్షలు’ అంటూ నాగచైతన్య ఖాతాని ట్యాగ్‌ చేసింది. ఈ పోస్ట్‌కు స్పందించిన పలువురు తారలు సమంత-నాగచైతన్యలకు పెళ్లి రోజు శుభాకాంక్షలు తెలియజేశారు.

టాలీవుడ్‌ నటి, నిర్మాత మంచు లక్ష్మి తన తల్లితో దిగిన చిన్నప్పటి ఫొటోని పోస్ట్ చేసింది. ఈ సందర్భంగా ‘ఒక్క ఫొటో వెయ్యి మాటలు తెలియజేస్తుంది.. కానీ ఈ ఫొటో నా తల్లి నన్ను ఎంత ప్రేమిస్తుందో నాకు గుర్తు చేస్తుంది.. నాకు గొప్ప గురువు, థెరపిస్ట్‌, బెస్ట్‌ ఫ్రెండ్‌ అన్నీ అమ్మే. నేను నీకు ఎప్పటికీ రుణపడి ఉంటాను.. అమ్మా.. లవ్‌ యూ’ అంటూ తల్లిపై తనకున్న ప్రేమను వ్యక్తపరిచింది.

క్యారక్టర్‌ ఆర్టిస్ట్‌ ప్రగతి తన తాజా ఫొటోలను అభిమానులతో పంచుకుంది. దీనికి ‘మీకు తగిలిన గాయాలే మిమ్మల్ని కొత్తగా తీర్చిదిద్దడంలో ఉపయోగపడతాయి. కాబట్టి వాటిని మర్చిపోకండి’ అని రాసుకొచ్చింది.

బాలీవుడ్‌ సుందరి కాజోల్‌ తన తల్లికి పుట్టినరోజు శుభాకాంక్షలు తెలిపింది. ఈ సందర్భంగా తనతో దిగిన ఫొటోని పంచుకుంటూ ‘నేను నీతో ఉన్నప్పుడు ఒక సైన్యంతో ఉన్నంత భావన కలుగుతుంది.. ఒక మహిళలో ఉండే అన్ని కోణాలను నాపై చూపించిన నీకు పుట్టినరోజు శుభాకాంక్షలు. హ్యాపీ బర్త్‌ డే మమ్మా.. లవ్‌ యూ సో మచ్‌. నీ బిడ్డగా నాకు జన్మనిచ్చినందుకు ఎప్పుడూ నీకు రుణపడి ఉంటాను’ అంటూ తల్లిపై తనకున్న ప్రేమను వ్యక్తం చేసిందీ బ్యూటీ.

సూపర్‌ స్టార్‌ మహేష్‌ బాబు సతీమణి నమ్రతా శిరోద్కర్‌ ఓ ఆసక్తికరమైన ఫొటోని పోస్ట్‌ చేసింది. దీనికి ‘ఇది మీ బుర్రకు పదునుపెట్టే సమయం. ఈ ఫొటోలో ఏడుగురు మనుషులు, ఒక పిల్లి ఎక్కడ ఉన్నాయో కనిపెట్టండి. మీరు కనిపెట్టినట్లయితే మీ మెదడు బాగా పని చేస్తోందని అర్థం.. ఒకవేళ అయిదుగురి కంటే తక్కువ మందిని మాత్రమే కనిపెట్టగలిగితే ఒక్కసారి గట్టిగా ఊపిరి తీసుకొని తిరిగి తాజాగా ప్రయత్నించండి’ అని చెప్పుకొచ్చింది.

‘బిగ్‌బాస్‌’ బ్యూటీ హిమజ ఆనందంతో గెంతులేస్తున్నట్టుగా దిగిన ఫొటోని పోస్ట్‌ చేసింది. దీనికి ‘మొదట మిమ్మల్ని మీరు ప్రేమించుకోండి’ అని రాసుకొచ్చింది.

టాలీవుడ్ సుందరి రష్మిక పళ్ళు కనిపించేలా నవ్వుతున్న ఫొటోని పోస్ట్ చేసింది. 'తమకు తెలియని వ్యక్తులెవరైనా తమను చూసి నవ్వినప్పుడు కొంతమంది విచిత్రంగా చూస్తారు.. లేదా అలా నవ్వేవారికి పిచ్చి అనుకుంటారు.. మీరు కూడా అలాగే అనుకునేటట్లయితే మీరు నా ఫ్రెండ్ కాదు.. ఎందుకంటే నేను కూడా అలాంటి అపరిచితురాలినే.. ఎవరిని చూసినా నా స్టైల్ లో నేను నవ్వేస్తుంటాను..' అంటూ కోతి ఎమోజీ జత చేసిందీ భామ.

బాలీవుడ్‌ సుందరి షమితా షెట్టి తనకి ముద్దుపెడుతున్న ఓ బాబు ఫొటోని అభిమానులతో పంచుకుంది. దీనికి ‘మిస్సింగ్‌ మై నాటీ లిటిల్‌ బేబీ’ అని క్యాప్షన్‌ కూడా ఇచ్చింది. ఆ అబ్బాయి ఎవరో కాదు.. తన సోదరి శిల్పా శెట్టి కొడుకు. ఈ పోస్ట్‌కి ‘మీరిద్దరూ నా బేబీసే’ అంటూ శిల్ప రిప్లై ఇచ్చింది.

నటి ప్రగతి నవ్వుతోన్న తన ఫొటోని పోస్ట్‌ చేసింది. ‘ఏదైనా కావాలని మీరు బలంగా కోరుకున్నప్పుడు విశ్వం మొత్తం దానిని సాధించడంలో మీకు సహకరిస్తుంది..’ అని చెప్పుకొచ్చిందీ భామ.

మాటల మరాఠీ, యాంకర్‌ సుమా కనకాల ‘వాట్సప్‌ కష్టాలు’ అంటూ ఓ వీడియోని పోస్ట్‌ చేసింది. ఈ వీడియోలో చాటింగ్‌ కోసం ఏ అంశానికి ఎలాంటి ఎమోజీలు ఉపయోగిస్తుంటారో ఫన్నీగా చెబుతోంది సుమక్క.

ప్రముఖ హీరోయిన్‌ మీనా తన ఫిష్‌ పాట్‌లో ఉన్న చేపలను చూస్తోన్న ఫొటోని పోస్ట్‌ చేస్తూ ‘ఎవరైనా ఈ ఫొటోకి మంచి క్యాప్షన్‌ పెడతారా’ అని అభిమానులను అడిగింది. దాంతో ‘మీనాలను చూస్తోన్న మీనా’, ‘ఒక అందమైన చేప మరో రెండు అందమైన చేపలను చూస్తోంది’, ‘బంగారు వర్ణపు చేపలను చూస్తోన్న అందాల రాశి’ అంటూ పలువురు అభిమానులు కామెంట్ల రూపంలో పెట్టారు. వీటికి స్పందింస్తూ ‘వావ్‌.. మీరు ఇచ్చిన క్యాప్షన్లలో ఒక్కదానినే ఎంచుకోవాలంటే చాలా కష్టం. నాకు అన్నీ నచ్చాయి. మీ ఇమాజినేషన్‌కి ముగ్ధురాలినయ్యాను. అందరికీ కృతజ్ఞతలు’ అంటూ అభిమానులకు రిప్లై ఇచ్చిందీ సుందరి.

అందాల తార సమంత క్యారట్లను పట్టుకొని దిగిన ఫొటోని అభిమానులతో పంచుకుంది. దీనికి ‘ఈ వారం మెనూ.. క్యారట్‌ జ్యూస్‌, క్యారట్‌ పచ్చడి, క్యారట్‌ హల్వా, క్యారట్‌ ఫ్రై, క్యారట్‌ పకోడి, క్యారట్‌ ఇడ్లీ, క్యారట్‌ సమోసా’ అంటూ ‘గ్రో విత్‌ మి’ అనే హ్యాష్‌ట్యాగ్‌ని జత చేసిందీ భామ. ఈ క్యారట్లను సమంతే స్వయంగా తన గార్డెన్‌లో పండించింది.

నటి ప్రగతి తన తాజా ఫొటోని పోస్ట్‌ చేసింది. దీనికి ‘మీకు మీరే ఒక ఫైటర్.. గతంలో మీరు అధిగమించిన సమస్యలను, పరిస్థితులను ఒక్కసారి గుర్తు తెచ్చుకోండి. ఇప్పుడు కూడా అలాగే పోరాడండి.. పారిపోకండి..’ అంటూ కరోనా కష్ట కాలంలో తన అభిమానులకి ధైర్యం చెబుతోందీ సూపర్‌ మామ్.

టాలీవుడ్‌ భామ రేణూ దేశాయ్‌ తన జుట్టు విరబోసినట్టుగా ఉన్న ఫొటోని అభిమానులతో పంచుకుంది. దీనికి ‘హ్యుమిడిటీ వల్ల నా జుట్టంతా చింపిరిగా మారింది.. పిచ్చుకలు కచ్చితంగా నా జుట్టుపై గూళ్లు కడతాయి.. దయచేసి వాటిని లెక్కించండి’ అంటూ తన స్నేహితులను జత చేసిందీ భామ.

టాలీవుడ్‌ భామ లావణ్యా త్రిపాఠి అంటే మనకు మొదట గుర్తుకు వచ్చేది ‘అందాల రాక్షసి’ చిత్రం. ఈ చిత్రం విడుదలై నేటితో 8 వసంతాలను పూర్తి చేసుకుంది. ఈ సందర్భంగా లావణ్య ఈ సినిమాలోని కొన్ని ఫొటోలను అభిమానులతో పంచుకుంది.

సూపర్‌ స్టార్‌ మహేష్‌ బాబు సోదరి మంజులా ఘట్టమనేని తన కుటుంబ సభ్యులు భౌతిక దూరం పాటిస్తూ మాట్లాడుకుంటున్నట్టుగా ఉన్న ఓ ఫొటోని పోస్ట్ చేసింది. దీనికి ‘భౌతిక దూరం పాటించడం అంత కష్టంగా ఏమీ లేదు.. ఇది మన ప్రమేయం లేకుండా వచ్చింది’ అంటూ ఫ్రెండ్స్‌ టైమ్ హ్యాష్‌ట్యాగ్‌ని జోడించింది.

అందాల తార కియారా అడ్వాణీ నేడు తన పుట్టిన రోజు జరుపుకొంటోంది. ఈ సందర్భంగా వివిధ కేకుల ముందు కూర్చొని ఉన్న ఫొటోని అభిమానులతో పంచుకుంది. ‘నా పుట్టిన రోజు సందర్భంగా నా కుటుంబ సభ్యులు, స్నేహితులు, అభిమానులు... వీడియోలు, మెసేజ్‌లు, ఫోన్‌ కాల్స్‌తో ప్రేమాభిమానాల వర్షం కురిపించారు. మీ అందరికీ నా హృదయపూర్వక ధన్యవాదాలు. చాలా ఆనందంగా ఉంది. నేను ఇప్పుడు ఎలా ఉన్నానో, మీరు కూడా అంతే ఆనందంగా, ఆరోగ్యంగా ఉండాలని ప్రార్థిస్తున్నాను.. ఇదంతా దేవుని ఆశీర్వాదమే’ అంటూ రాసుకొచ్చిందీ సుందరి.

టాలీవుడ్‌ సెన్సేషనల్‌ హీరో విజయ్‌ దేవరకొండ, అందాల తార రీతూ వర్మ నటించిన చిత్రం ‘పెళ్లిచూపులు’. చిన్న సినిమాగా విడుదలై మంచి కలెక్షన్లు పొందిన ఈ చిత్రం విడుదలై నేటికి నాలుగు సంవత్సరాలైంది. ఈ సందర్భంగా రీతూ వర్మ అప్పటి జ్ఞాపకాలను, ఫొటోలను అభిమానులతో పంచుకుంది.

టాలీవుడ్‌ భామ రకుల్‌ ప్రీత్‌ సింగ్‌ దేనికోసమో ఎదురు చూస్తున్నట్టుగా ఉన్న ఫొటోని పోస్ట్‌ చేసింది. ఫొటోకి తగ్గట్టే ‘ప్రపంచమంతా ఎప్పుడెప్పుడు సాధారణ స్థితికి చేరుకుంటుందా అని వేచిచూస్తున్నా’ అని రాసుకొచ్చిందీ సుందరి.

ప్రముఖ సింగర్‌ శ్రేయా ఘోషల్‌ తన ఫొటోని పోస్ట్‌ చేస్తూ అభిమానులకు థ్యాంక్స్‌ చెప్పింది. అభిమానులకు థ్యాంక్స్‌ చెప్పడమేంటీ అనుకుంటున్నారా? 2010లో అమెరికాలోని ఒహాయో రాష్ట్రం జూన్‌ 26ని ‘ శ్రేయా ఘోషల్‌ డే’ గా ప్రకటిస్తూ ఆమెను గౌరవించింది. దాంతో ప్రతి ఏడాది తన అభిమానులు మర్చిపోకుండా జూన్‌ 26ని సెలబ్రేట్ చేస్తున్నారు. నిన్నటితో 10 వసంతాలు పూర్తయ్యాయి. ఈ సందర్భంగా ఎప్పటిలాగే అభిమానులు శ్రేయా ఘోషల్‌ పైన ప్రేమాభిమానాలు కురిపించారు.

నటి ప్రణీత హోతూర్ ఫౌండేషన్ని సందర్శించింది. ఈ సందర్భంగా సంస్థ చీఫ్(షాదాబ్ వాహబ్)ని ప్రశంసిస్తూ.. ‘యాసిడ్ దాడి బాధితుల కోసం ఆమె చేస్తోన్న కృషి అభినందనీయం. ఈ మహిళలు ధైర్యానికి, పట్టుదలకు చిహ్నాలు’ అంటూ అర్ధవంతమైన క్యాప్షన్ని రాసుకొచ్చిందీ సుందరి. దానికి సంబంధించిన ఫొటోలను కూడా పోస్ట్ చేసింది.

ఈ రోజు ఇన్‌స్టాపురములో బాలీవుడ్‌ భామలు అనుష్కా శర్మ, కరీనా కపూర్‌ గల్వాన్‌ దాడిలో వీరమరణం పొందిన జవాన్లకు నివాళులర్పించారు. ‘ఒక జవాను వీర మరణం పొందితే దాన్ని జీర్ణించుకోవడం ఎంత కష్టమో, ఆ బాధ ఎలా ఉంటుందో.. ఒక సైనికుడి కూతురిగా నాకు తెలుసు.. వారు తమ ప్రాణాలను పణంగా పెట్టి, కుటుంబానికి దూరంగా ఉండి చేసే ఈ త్యాగం అసమానమైనది. ఈ సమయంలో శాంతి నెలకొనాలని, వారి కుటుంబాలకు ఆ భగవంతుడు ధైర్యాన్ని, శక్తిని ప్రసాదించాలని ప్రార్థిస్తున్నా.. జై జవాన్‌’ అంటూ తన గుండెల్లోని దేశభక్తిని చాటింది అనుష్క.

ఈరోజు ఇన్‌స్టాపురములో రకుల్‌.. సీడ్స్‌ (విత్తనాల) వల్ల కలిగే ప్రయోజనాల గురించి చెప్పింది. పొద్దుతిరుగుడు-నువ్వులు, గుమ్మడి-అవిసె గింజల కాంబినేషన్లు మన హార్మోన్ల ఆరోగ్యానికి ఎంతో మంచివంటూ ఓ పోస్ట్‌ పెట్టిందీ భామ.

ఈరోజు ఇన్‌స్టాపురములో మన తారలు బర్త్‌డే విషెస్‌తో ముంచెత్తారు. మంచు లక్ష్మి, ఛార్మీ.. బాలయ్య బాబుకి పుట్టినరోజు శుభాకాంక్షలు తెలిపారు. నటి ప్రణీత బాలకృష్ణకి విషెస్‌ చెబుతూనే.. సోనమ్‌ కపూర్‌కి ఒక రోజు ఆలస్యంగా తన శుభాకాంక్షలను తెలియజేసింది.

రష్మీ గౌతమ్‌ అంటే తెలుగు ప్రేక్షకులందరికీ సుపరిచితమే. రష్మీ.. 2002లోనే తన సినీ ప్రస్థానాన్ని ప్రారంభించింది. సినిమాల్లో వివిధ పాత్రల్లో ‘జబర్దస్త్‌’షోతో యాంకర్‌గా తనకంటూ ఓ ప్రత్యేక స్థానాన్ని సొంతం చేసుకుంది. ఆ తర్వాత పలు చిత్రాల్లో హీరోయిన్‌గానూ నటించింది. ఒకవైపు యాంకరింగ్‌ చేస్తూనే మరోవైపు సినిమాల్లో నటిస్తూ బిజీ స్టార్‌గా మారిపోయింది. తను ఎంత బిజీగా ఉన్నా తన లేటెస్ట్‌ ఫొటోలను ఎప్పటికప్పుడు అభిమానులతో పంచుకుంటుంది. తను 2007లో నటించిన ‘యువ’ సీరియల్‌కి సంబంధించిన ఒక ఫొటోను తాజాగా అభిమానులతో పంచుకుంది. ‘నిత్యం ప్రయత్నిస్తూ, మనకు లభించే వాటిని ఉత్తమంగా తీర్చిదిద్దుకోవడమే జీవితం’ అనే క్యాప్షన్‌ని ఈ ఫొటోకు జోడించిందీ ఎనర్జిటిక్‌ యాంకర్‌.

సోషల్‌ మీడియాలో బిజీగా ఉండే వారికి దీప్తి సునైనా పేరును ప్రత్యేకంగా పరిచయం చేయాల్సిన అవసరం లేదు. మన ట్యాలెంట్‌తోనే అన్ని రకాల అవకాశాలను అందిపుచ్చుకోవచ్చని చాటి చెప్పిందీ డబ్‌స్మాష్‌ క్వీన్‌. బిగ్‌బాస్‌ రెండో సీజన్‌తో మరింత పాపులారిటీ సంపాదించుకున్న దీప్తి.. సోషల్‌ మీడియాలో చురుగ్గా ఉంటుంది.

లాక్‌డౌన్‌ కారణంగా షూటింగ్‌లు లేకపోవడంతో ఇంటికే పరిమితమయ్యారు నటీమణులు. ఒకప్పుడు తీరిక లేకుండా బిజీగా గడిపిన ముద్దుగుమ్మలు ఇప్పుడు ఇంట్లోనే ఉంటున్నారు. అయితే పేరుకు ఇంటికే పరిమితమైనా సోషల్‌ మీడియా ద్వారా తమ అభిమానులతో నిత్యం టచ్‌లోనే ఉంటున్నారు.

తనదైన సహజ నటన, అందంతో ప్రేక్షకులను ఆకట్టుకునే నటీమణుల్లో అనుపమా పరమేశ్వరన్‌ ఒకరు. ఆచితూచి సినిమాలను ఎంచుకునే ఈ కేరళ బ్యూటీ ఇప్పటి వరకు చేసిన సినిమాలన్నింటిలోనూ నటనకు ప్రాధాన్యం ఉన్న పాత్రల్లోనే నటించి మెప్పించింది. ఇక అనుపమ సోషల్‌ మీడియాలోనూ చాలా యాక్టివ్‌గా ఉంటుంది. ఎప్పటికప్పుడు తన క్యూట్‌ ఫొటోలను పోస్ట్‌ చేస్తుంటుందీ బ్యూటీ.